Veseli: Kosova s’ka aleat më të rëndësishëm se SHBA-në

Kryetari i Kuvendit të Kosovës, Kadri Veseli, ka qenë i ftuar në pritjen e parë zyrtare në Rezidencën e Ambasadorit Amerikan në Kosovë, Philip Kosnett.

Kreu i Kuvendit, njëherësh lider i PDK-së, Kadri Veseli, ka shkruar në faqen e tij në Facebook se në këtë pritje ndër të tjera ka theksuar që Ambasada Amerikane në Prishtinë ka qenë gjithmonë shtëpi e shpresës dhe mbështetjes.

“Në pritjen e veçantë në Rezidencën e Ambasadorit të SHBA-së në Kosovë, Philip Kosnett, theksova se për shqiptarët, Ambasada Amerikane në Prishtinë ka qenë gjithmonë shtëpi e shpresës dhe mbështetjes”, ka shkruar Veseli.

Mësohet se në këtë pritje në Rezidencën e Ambasadorit Amerikan, Kryeparlamentari Veseli ka falënderuar SHBA-në për ndihmën e vazhdueshme që kanë bërë për popullin e Kosovës si në kohën e luftës, po ashtu edhe në paqe.

Veseli ka ritheksuar qëndrimin e tij se për shtetin e Kosovës nuk ka aleat më të rëndësishëm sesa SHBA-në dhe miqësia Kosovë-SHBA do të jetë e përhershme.